網議政事：埋堆Cheap禎搲票？ 毛婆露底得啖笑

傳統反對派「大台」欽點的候選人、工黨的你呃人（李卓人）在剛過去的立法會九龍西補選落敗，傳統反對派就四圍「捉鬼」，公民黨前主席余若薇就「怪罪」原「青山絕症（青年新政）」的黃埔區議員鄺葆賢「冇盡力」為你呃人拉票，引起網絡大戰。其實，大家都似乎忽略咗自組「香港本土」嘅毛婆（毛孟靜）：佢喺你呃人敗選後，話「無論如何努力，都無法『取回』令『青年新政』游蕙禎當選的超過2萬票」喎。唔少人寸佢，呢番說話可謂「圖窮匕現」，證明佢之前同Cheap禎「扮friend」，原來終極目標只不過係幫「大台」去「取回」選票。

Cheap禎喺立法會宣誓時搞亂檔，其後更強闖立法會議事廳夾硬要宣誓多一次，毛婆都一直長伴左右，之後Cheap禎因此而坐監到放監，毛婆都好似關懷備至咁。原來，佢同「熱狗」主席蟲泰（鄭松泰）都係一擔擔，都只不過係「扮friend」，想呃啲「白痴」選民。

話說毛婆喺你呃人敗選後接受傳媒訪問時話，今次補選結果反映似乎點樣努力，「大台」都無法「取回」令Cheap禎當選的超過2萬票，令她傷感，「因此（大台）必須痛定思痛，深思如何做得更好」云云。

網民破「盲腸」：老青互過橋

唔少網民都好唔妥毛婆咁講。「Navis Spring」直指：「唔係睇在『青政』遺產，毛孟靜鬼會幫『青政』咩！知唔知咩叫做臨老竇死先黎（嚟）扮孝子啊！」「Vincent Wai Kit Man」亦話：「同鄭松泰一樣：『扮friend』！」「Willy Chan Yiu」就回帶：「光復行動呀巫婆有出嚟割席啦！」

「何文駒」就「警告」：「毛姨姨，你如果再繼續將責任推比（畀）人地（哋），下一個落選既（嘅）人將會係你！」「Randolph Lui」則突破「盲腸」：「根本班老鬼就想利用班廢青做爛頭蟀，但班廢青就只想利用你班老鬼扶上位，夾走你班選民，各懷鬼胎！」

其實唔少「港獨」分子好唔妥，其他反對派中人都對此有保留。喺你呃人選舉期間一直幫你呃人「×票」嘅「人民力量」副主席譚得志就質問：「毛ee說民主派要消弭同『本土派』的隔閡，我問三問題：這是民主派的共同想法？誰是『本土派』代表？如何消弭？」

同道批愚蠢：搶票唔知票源

佢仲寸嘴話：「毛ee叫民主派同『本土派』消除隔閡，但『本土派』等如『焦土派』，想民主派死曬（晒）......咁民主派仲同班『焦土派』消除隔閡嚟做乜？」

社民連「金鷹」曾浚瑛亦喺facebook打咗篇文，話反對派呢個結論係愚不可及，因為根本唔知「本土派」啲票點嚟，好似「狗主」黃毓民本身已經做咗兩屆議員，有啲票源反對派根本接觸唔到，況且反對派根本無諗住同狗主講數。

至於「青症系」嘅Cheap禎（游蕙禎）同鄺葆賢，佢就話就隨時連佢哋本身都唔知自己啲票係點得嚟，「『本土』究竟是什麼？其實不外是添加些民粹味精，再換上哈台文青用字的『民生議題』而已。」

【華發網根據文匯報採編】