工程撥款投贊成票 訟黨兩頭蛇被鬧爆

■「無神論者的巴別塔」鬧爆反對派。「無神論者的巴別塔」fb截圖

雖然明知實情唔係咁，但反對派經常為咗激化矛盾撈政治本錢，而大大力唱衰政府各項政策及措施，但投票時「一絲尚存嘅理智」，就令到佢哋最終都係投贊成票，而呢種「精神分裂」就搞到佢哋班支持者無所適從。上周五，立法會財務委員會審議2019/20年度基本工程儲備基金整體撥款，最後獲得通過，公民黨3個議員原來都投咗贊成票，即刻俾自己支持者鬧爆。有人話反對派雖然唔夠票否決，但冇理由連投反對票呢啲表面工夫都唔做。有人更直言，公民黨不嬲都係兩頭蛇，咁嘅黨出埋呢啲政棍有咩咁出奇咁話。 

喺一個多元社會裡面，唔同嘅政黨有唔同立場係好自然嘅事，但香港反對派為咗反政府而經常將一樣嘢唱到有咁衰得咁衰，挑起支持者對政府嘅不滿，但又心知肚明自己講嘅嘢係誇張咗，結果呢樣嘢上到立法會，佢哋就「良心乍現」投贊成票。雖然無論基於咩原因，佢哋投贊成票都叫做咗件「好事」，但之前幫佢哋唱衰搖旗吶喊嘅黃絲，就即時玻璃心碎，即刻鬧爆囉。

話說政府向立法會申請約150億元嘅2019/2020年度基本工程儲備基金整體撥款，其中有7項同新界東北發展有關，包括地盤平整同基礎設施工程 、收回土地以便展開新界東北堆填區擴建、排污工程等等。

唔少反對派議員就講到明反對新界東北發展，不滿政府綑綁喺其他工程開支裡面，不斷拉布、阻撓，直到上星期五先上到去財委會。

戇橋賴綑綁 「土盟」繼續插

結果，財委會以30票贊成、8票反對同5票棄權通過，其中3票贊成嚟自公民黨，包括戇橋、陳淑莊同譚文豪。

身為公民黨黨魁嘅戇橋就解畫，話撥款申請包含咗多項不同工程，而佢哋認同有部分工程需要盡快展開，包括其他地區嘅學校、斜坡同泳池等，而就某啲項目撥款投贊成票，唔代表全盤支持新界東北發展規劃喎。

由「議會陣線」議員朱凱廸揸旗嘅「土地正義聯盟」就發帖，話公民黨投下贊成票「令人遺憾」，並對戇橋議員以「東北以外，尚有民生項目」為由贊成，尤其令人憤怒，「當年『民主派』議員尚努力爭取抽起爭議項目，到今天公民黨在今年投下的贊成票，不僅是對撥款的贊成，更變相認可、鼓勵政府將爭議項目綑綁基本工程儲備基金的做法，『土盟』實在不敢苟同。」

「獨」人就更加鬧埋一份。中大「獨」講師劉正就喺�嘅「無神論者的巴別塔」fb專頁話：「我從來認為政黨有不同立場係等閒事，但至少要誠實和有一致性邏輯，否則就是政棍。」

佢話，除咗投贊成票嘅戇橋、譚文豪同陳淑莊3個之外，「不要放過有份投棄權票黃碧雲、鄺俊宇、林卓廷、尹兆堅、葉建源......在財委會是行簡單多數制，意即棄權票和缺席投票意思一樣。」

「獨」師點名缺席「飯民九」

劉正仲點名「胡志偉、涂謹申、許智峰（峯）、郭榮鏗、郭家麒、梁耀忠、梁繼昌、莫乃光、李國麟九個『飯民』議員，又再秉承『優良』的『飯民傳統』，繼續缺席投票。記得早幾天權力及特權法查沙中線，『飯民』難得齊人全體投票，NOWTV的《政情網上行》與（以）及『黃屍KOL』立刻大肆吹捧，......現在我就問你班垃圾，今次財委會撥款投票有大量聲稱會『守護香港』的『飯民』政棍缺席，為何你們又會隻字不提呢？......然後你叫我下次『含淚』再投這班政棍，傻的嗎？」

「神駒」仇思達亦發帖質問其他反對派中人：「公民黨支持（新界）東北發展撥款，請問『13+3』（因反新界東北發展案而入獄的13位示威者和『雙學三子』）幾時譴責楊岳橋，以及去公民黨總部示威？」

網民譏玩嘢買兩邊

Griffon Tsang：支持又死，反對又死。反對又話阻建築工人生計。

Debby Kong：公民黨、民主黨一邊投贊成票，一邊又話唔系（係）支持規劃發展，咁你唔系（係）支持規劃又投贊成票？成日玩嘢買兩邊！

Sica Hana：「關鍵一席」又發揮作用。

Stephen Wai：公民黨不嬲都系（係）兩頭蛇啦，有此政黨出此政棍有乜出奇。

施敏賢：其實佢投反對票都唔會影響投票結果喇......連呢啲表面央]工）夫都唔做，搏（博）咩？

Hui Yin Clement Tsang：2020選舉楊岳橋都依然一定會當選，真係仲有好多香港人會相信呢班所謂「反對派」......

Jason Tang：如果下屆公民黨冇被選民懲罰，證明有相當數量市民支持其做法。

 ■來源：香港文匯報