懷舊黑膠旋風回歸！

懷舊黑膠旋風回歸！潮玩 Vinyl 必知的 18 件事（上）柔之拔四月 28, 201519:02

玩黑膠（Vinyl）是一種生活態度；像是好懷舊，卻又散發著無可抗拒的潮味！ezone.hk 樂迷也想沉迷 Vinyl 卻無從入手？以下由科技界潮流達人 Alan 指點迷津，教你由零開始戀上黑膠。

【01】$2,380 玩多功能黑膠唱機

聽黑膠，當然要黑膠唱機。貴唔貴呀？JC Shop 有好多專為新手而設的入門機選擇。Alan：「如果堅想抵食夾大件，推介 Morisaki MO-AV-065，佢係『五合一黑膠唱機』，已內置擴音器和喇叭，只要放上黑膠唱片，即買即聽。」

「佢亦可播 CD 唱片、FM/AM 電台、插 USB 手指與 SD 卡播歌、音質未必好高，勝在夠方便；最重要係可以把黑膠或 CD 轉錄到 USB 手指或 SD 卡，128kbps 格式，記得轉錄的時候要自己手動在歌與歌之間停頓，否則佢會一條 track 幫你轉錄整張黑膠的歌啊！」定價 $2,380、附遙控器、機背有 Audio 輸出，俾你升級另駁後級放大器及喇叭，玩得更發燒。

不少音響店、影音連鎖店、甚至唱片店都有黑膠唱機發售，曾有樓上舖販賣低至 $900 的 portable 黑膠唱機，迅即售罄呢！

【02】鴨記尋寶搵黑膠

聽黑膠，當然要黑膠唱片。唔使驚冇 source，除了大型唱片連鎖店外，Alan 更喜歡到深水埗鴨寮街買黑膠唱片：「努力搵，會搵到好多靚珍藏；慢慢搵，會搵到好多好嘢。好多二手唱片可能只係賣十蚊廿蚊，你要俾耐性用心去搵就會搵到了。」搵膠都是一種樂趣，膠本身就是藝術品，買膠唔聽齋儲，閒來擦拭拭，也是高尚品味。

HMVideal 有個 area 專賣黑膠唱機、黑膠唱片及配件，是膠迷朝聖蒲點。

目測不少新專輯都有提供 LP 與 CD 版本，LP 是售價約為 CD 的一倍。

【03】買碟講價有密技

Alan：「揀二手碟，要自己睇有冇花、有幾花、發霉、要自己拿出來看；個封套只係外表，時間長幾十年乜都變黃 ok 的，入面有膠套保護隻碟，發霉與否要看你如何保養。」

講得興奮，突傳密技：「一般賣 $20 至 $50，你識講價，買多幾隻，佢十蚊隻賣俾你都得，因為佢都想去咗啲貨。記住先後次序『先傾價，後揀膠』，如果你揀好哂碟拎了上來才講價，佢一蚊都唔減俾你，因為你本身知價錢的（心中有數），你拎了上來，你實要買。」

【04】網購黑膠潮到爆

如果唔識欣賞身水身汗逛鴨記的箇中樂趣，網購又如何？Alan 推介去yahoo.jp怒搜 LP、Vinyl 等關鍵字：「去 yahoo.jp 舊碟拍賣，日本人放上網拍賣，有全新未開封的，我也買過幪面超人 $500 蚊港幣，如果香港買要 $1,000 以上。放心，日本唔呃人，佢哋有呢個市場。」前提是…最好識日文。

【05】二手膠有價有市

膠農膠粉膠黑注意鳥！黑膠除了用來聽歌、用來當藝術品味、更可以用來投資，二手膠有價有市！Alan：「我去鴨記買過 Michael Jackson，幾十蚊，是在佢死之前買，佢死後，黑膠碟炒到好高，可以變幾千蚊一張！我梗係冇拎去炒（讚），我放在公司俾人試聽（原來是放長線釣大魚，絕讚！），另外仲搵到 Air Supply 及 Whitney Houston 等，慢慢搵，鴨記真係好多好嘢！」

【06】擦拭膠霉有妙法

「黑膠未發霉前要放防潮珠，如果存放時間長，就用報紙吧，可以保存 20 年都得，索哂黑膠的水氣，報紙唔會濕；用報紙把黑膠唱片逐隻包住，一層一層疊起好乾爽。」

「如發了霉，好簡單，把黑膠唱片放進水裡，用手把肥皂捽碟，再用海綿輕柔力量順時針方向慢慢轉抹乾，唔好用力捽，坑紋花咗跳針冇得保養玩完，因此乜都輕力啲，發霉唔緊要，抹乾後再聽真係特別靚聲。」

圖中箱仔可以整齊存放黑膠唱片，HMVideal 有售，$359。

【07】唱針壽命百小時？

黑膠碟機如何保養？「最佳貼士，唔聽唔好放出來，唔好覺得很 classic 當係家居裝飾，唔用就要蓋好唱盤，黑膠會花，支唱針都會花，支針有塵好難抹。一支唱針平均只會播放 50 至 100 小時，真係聽先播，唔好是咪都播；如買黑膠碟機，要問店舖有冇唱針可配，有幾多支針盡買，否則黑膠唱機冇咗支針，唔知點樣用。」

【08】膠播百次便陣亡？

Alan 警告：「一隻黑膠唱片，播幾十次就花哂，好少可以播 100 次。佢嘅運作原理就係，在黑膠唱片上有好多坑紋，記錄音訊，把整支黑膠唱臂和唱針壓在黑膠唱片上面，唱針經過凹凸坑紋，拾取模擬音訊。如何調校唱臂重量，避免唱臂重量完全壓在黑膠唱片加速膠膠死亡，係一門學問。」

【09】膠歌勝在唔 perfect

「夜晚聽『膠歌』是否更舒服，更有風味？係！鍾意黑膠就係鍾意佢唔 perfect 的聲音，呢個係死症，你吹我唔漲，就像數碼相機與菲林相機，後者仍然有大班粉絲。」

「黑膠有風有塵，播起來自有一種膠味，勾起回憶，10 餘歲死慳死抵儲錢買膠，可能在 50 年前第一份工慳來的錢買膠…這些往日情懷就是年紀大的人才 feel 到。」

想知更多黑膠唱片的技術知識？密切留意〈潮玩黑膠必知的 18 件事〉下集。

Alan"s Profile

潮店 JC Shop 負責人，經常親征日本採購並引進各種潮流電子產品，包括瞄準年輕人市場的入門級多功能黑膠唱機。自小受父親薰陶而愛上 Vinyl，累積多年玩膠經驗。看着爸爸玩黑膠已是一種樂趣，畢生難忘：「他從唱片封套取出黑膠碟、慢慢用海綿擦拭、慢慢放上黑膠唱盤、慢慢把唱臂放到黑膠碟上、慢慢按 Play 掣、連坐下來聽歌的動作也很慢，因為佢好 enjoy。」

- See more at: http://www.e-zone.com.hk/channelnews.php?id=6347#sthash.Qte7V35x.dpuf