古巨基被爆 摸住古太才安心

■基仔化身銀色戰士坐在十多呎高的「時光機」現身。

提防再墮台 全場嗌「靚仔睇路」

一連四場《古巨基we我們世界巡迴演唱會--香港站Part 2》前晚假紅館開鑼，基仔經歷過Part 1的跌台陰影，今次加闊舞台之餘，並喚起全場近萬粉絲提醒他「睇路呀，靚仔」，免得歷史重演。基仔又在台上分享與太太Lorraine的婚姻保鮮方法，但就冷不防被嘉賓容祖兒大爆他兩公婆的恩愛史，踢爆基仔最愛摸住古太，睇到眼冤兼火滾，弄得基仔尷尬不已！

當晚前來捧場的圈中人多不勝數，計有黃子華、周慧敏和老公倪震、江美儀、陳敏之、薛家燕、陳妙瑛、蔡一智、方力申、羅力威和老婆雨僑等。基仔化身銀色戰士坐在十多呎時光機獻唱《爆了》現身，之後唱完《夢中人》便對觀眾說：「無論你上次有冇來睇過，都知道呢個窿！今晚大家可以睇到減咗兩行觀眾席，我個台闊好多，打觔斗都得，會更加安全，今次開騷很多朋友不是講Good Show，而係叫小心一些，睇住個窿，既然大家都有陰影，不如一齊將擔憂釋放出來，一齊提醒我大叫『睇路呀，靚仔！』，為我注入能量。」全場便聽話照做，於是近萬人一齊大叫「靚仔睇路」，基仔笑謂：「好低B，竟然有人在紅館咁做！」

回味婚紗相保鮮婚姻

其間基仔表示把過住的情信都放在床下底，縱使結了婚，古太睡在身旁，情信依然在床下底，笑言：「古太胸懷大志......哈哈，係心胸廣闊先啱。」之後唱到婚姻主題歌曲時，播出基仔的獨白：「同太太結婚5年，有人話我哋一齊做嘢，嗌交會好難handle（處理），其實唔一齊做嘢又好易handle咩？婚姻係家家有本難唸的經，我哋係廿幾年工作夥伴，一直向住一個個夢想去衝，結婚後幾年先追番時間來體驗過往錯失的事物。如何保鮮婚姻？我久唔久會攞返婚紗相出嚟睇，睇返當時笑容，記錄由情侶變成親人嘅里程碑。」

頭場邀得祖兒擔任嘉賓，祖兒以Bra Top打扮現身，跟基仔合體「Juicy Lemon」，唱畢後祖兒開始滔滔不絕大爆基仔和太太的恩愛史，祖兒謂：「上次有睇Part 1，真的洋溢愛意，基仔在整個演唱會上沒有錯失機會表達對太太濃厚愛意，究竟你想點呢？好似我哋一班朋友同基仔食飯，基仔和太太好似孖公仔，睇到我眼冤火滾，基仔隻手一定要摸住古太，不停幫古太鍊來鍊去。」面露尷尬的基仔死撐道：「佢有啲駝背，要幫佢搓返直。」祖兒繼續爆料：「Juicy Lemon時都有一幕好難忘，有次臨出場前，基仔表現得好迷惘，心亂如麻，四處張望像找尋東西，原來他要摸一摸古太隻手先安心上台，這一幕畫面已經是13年前，我現在仍歷歷在目。」有點害羞的基仔笑罵說：「做咩講晒出來！」繼而兩人重影Juice Lemon時一起踢腳的合照。最後，祖兒表示希望基仔今次演唱會平平安安，祖兒又獨唱首本名曲《痛愛》才離開。

安哥環節，基仔唱出一連串金曲，又行到兩邊與觀眾握手，最後唱完《亂世情侶》及《友共情》後圓滿結束。

香港文匯報