【網議政事】稱延任先「幫到手」 黃碧雲圖食血饅

傳統「飯民」呢排被「抗爭派」瘋狂追打，日前搞記者會講12人蛇事件，想為自己加返分，但已成為鴿黨（民主黨）負資產嘅一嚿雲（黃碧雲）就偏偏出嚟「助攻」，話「民主派」如果唔做議員，邊個幫佢哋，一下就曝露佢哋搞咁多嘢都係為延任嘅真正企圖。「抗爭派」當然繼續追住打，鬧到一嚿雲要刪post兼道歉，仲搞到鴿黨都要出嚟認錯?

鴿黨立法會議員涂謹申日前同「抗爭派」立法會議員朱隊友（朱凱廸）一齊就12人蛇事件開記者會，明明係一台吹和風嘅戲，偏偏就俾一嚿雲一個留言破壞件事，佢質問：「朱議員如果撤退，就不能再用議員身份幫『手足』家屬。『民主派』議員若總辭，難道叫家屬去搵『保皇黨』議員？」

此言一出，唔少想拉傳統「飯民」落馬嘅「抗爭派」又傾巢而出追住打。前「香港大專學界國際事務代表團」成員邵嵐就鬧一嚿雲「無恥至極」，話當全世界都諗緊辦法幫12人蛇，「你黃碧雲喺度大大啖食人血饅頭、sell（推銷）你民主黨留守議會嘅主張。」

前「香港眾志」秘書長黃之鋒就引用電影台詞「If you're nothing without the suit, then you shouldn't have it.（如果沒有戰衣你就什麼都不是，那麼你不配擁有它）」，寸一嚿雲唔配做立法會議員；「抗爭派」「本小姐」話鴿黨有三部曲，「先由林卓廷對外大聲宣揚『有朋友幫手』，然後由涂謹申陪同出席家屬記招，再由黃碧雲說明這是要接受委任的原因......只是你們到底幫了什麼？為什麼『手足』還是音訊全無？」

連當日有份去記招嘅「港獨」分子鄒家成都出聲話自己都冇議席，「拜託唔好將12位『手足』當作政治炒作，亦唔好當作『留任』藉口，謝謝。」

眼見事情發展不似預期，一嚿雲只好刪post道歉，稱「本人明白將兩件事扣連或混為一談並不恰當，可能會令被扣押港人及其家屬感到冒犯及不安。因此，本人決定收回有關言論......希望他們接受我至誠的道歉」。鴿黨主席胡志偉亦因此無啦啦多撻瘌，要代表鴿黨向被扣押者及家屬致歉，真係偷雞唔成蝕渣米。

見圍插即跪低刪帖道歉

不過，「抗爭派」依然唔放過佢哋。攬炒派時評人梁啟智就反問道歉有咩用，要求一嚿雲「承諾未來一年所有議辦資助全部用來請『手足』/支援相關團體，所有議案按『初選勝出者聯席會議』的決定投票，以後個人淨係負責㩒（撳）掣就得了。這應該是底價了。」元朗區議員張秀賢亦轉載個post話，主留「飯民」要喺未來一星期畀到大家「具體承諾」，否則要拒絕延任。

梁啟智圖小罵大幫忙

「Kwok Hing Chan」就恥笑一嚿雲做乜都可能會出錯︰「佢係會禁（㩒）錯制（掣）的哦。」不過，梁啟智自己就係幫「飯民」做民調嘅「香港民研」「我們香港人計劃」名譽總監，「抗爭派」網民都唔放過打佢嘅機會，「Fai Ho」反問佢︰「都未有民調結果唔知會唔會接受委任，唔通你有內幕消息知道結果？」

其實明眼人都知，不論傳統「飯民」或「抗爭派」都一樣係為自己政治利益啫

【華發網根據文匯報採編】