【網議政事】泛暴候任區員 網煽黑暴亂港

公然打卡揭撐暴真面目 刻意鼓動仇警毀平安夜

前晚原本係喜迎聖誕嘅平安夜，但因為一班黑衣魔又出嚟搞搞震，入侵各大商場，滋擾同破壞店舖，更攻擊便裝警員製造混亂，嚇走行緊街嘅市民，令到呢個平安夜一啲都唔平安。不過，一班一向聲稱關心民生、成功上位嘅泛暴派候任區議員，就紛紛喺facebook暴露咗�哋有份煽動暴徒上街參與暴力行為，竭盡所能搞亂香港，連大部分市民想要嘅一個平平安安嘅平安夜都唔放過。 

「光復東涌」發起人、東涌南區候任區議員王進洋就喺facebook明目張膽上傳咗一張自己喺暴亂現場戴口罩嘅相，仲附文聲稱「平安夜，要平安，慶祝同失身嘅機會大把，不過『手足』嘅公道，唔係咁多機會幫佢還......留待『光復』過後，你慢慢玩個夠」云云，再有標籤寫住「出黎（嚟）食宵夜喇喂」，公然煽人上街。

王進洋劉家衡自爆上前線

公民黨南昌北候任區議員劉家衡亦都打卡話自己喺暴亂現場，假惺惺話「不平安的平安夜，請在外的各位小心」云云，如果真係關心人哋嘅安全，唔係應該叫佢哋遠離暴力咩？

「熱血公民」、候任大埔區運頭塘區議員黃兆健，前晚就轉發「熱血公民」立法會議員鄭松泰喺8月份個post（帖子），內容係一張電話聯絡方法圖片，寫有「法律及被捕支持」、「熱血安全車隊」同「熱血義診」，聲稱「組織了一隊安全車隊，接送街坊平安回家」云云，好似係要話畀暴徒聽，佢哋有後台支持放心搞破壞咁話。

候任中西區區議員梁晃維，噚日午夜12點23分話自己「視察蘭桂坊」，實際就係為暴徒站崗放哨，報告防暴警察位置，方便暴徒趁虛而入。

梁晃維「睇水」 林廷衞煽仇

民主黨元朗東頭候任區議員林廷衞，則聲言「比（畀）人過一個平安既（嘅）平安夜係唔得既（嘅），如需協助可直接打比（畀）我。」又標籤咗一句「說好的不派防暴呢？」不過，翻查警方記者會，由頭至尾都未講過唔派防暴警察，林廷衞故意倒果為因，無非係企圖挑撥警民矛盾，甚至要將平安夜唔平安嘅責任推諉給警察。

所謂「獨立民主派」、葵青區議員周偉雄，前晚7點就上傳咗一張聖誕圖，但內容就唔係聖誕祝福，而係煽動人上街，佢就附文話「今個聖誕未必快樂，期待明年煲底同慶」、「光復香港、時代革命」、「五大訴求、缺一不可」云云，又倒果為因揚言「請即停止『濫暴』拘捕市民」云云，刻意煽動市民仇警情緒，為暴力添火加油。

周偉雄屈警 張秀賢庇魔

前「學民思潮」發言人、元朗候任區議員張秀賢，又發佈元朗警署消息，指「絕大部分被捕者見晒律師同落左（咗）口供，家屬同律師都已經喺警署離開，朝早會再跟進。」好似要話畀大家知搞完事就可以冇嘢咁話，即有心水清網民「Mokwan Chung」寸佢，「幾時跟進下商場被破壞......都系（喺）元朗地頭WO......襲警可以無事......」

一直煽暴的商台節目主持潘小濤，就轉發一個post，內容係「至少超過百名便衣在新城市廣場巡查。相信管理公司會努力配合警方」，佢叫「俾（畀）香港人過一個真正平安嘅平安夜，得唔得？」真係唔明佢係唔係唔理解乜叫「平安」，莫非到處縱火、堵路、搞破壞就係「平安」？

【華發網根據文匯報採編】