華發網繁體版

【今日之星】余若薇鬧長毛不受控 選新東恐輸多劑

【今日之星】余若薇鬧長毛不受控 選新東恐輸多劑

喂阿哥,又要補選嗱?反對派啱啱先喺九西補選香咗,雖然之後有可能喺新東舉行嘅補選贏返,都唔可以改變今屆立法會建制派喺地區直選同功能組別都有優勢嘅事實,之不過為咗嗰份優厚薪津,佢哋都係對呢個肥缺虎視眈眈,當然包括以為個位鑲咗坉茼W嘅社民連「長毛」梁國雄啦。不過,公民黨前黨魁余若薇就兜盆冷水照頭淋,話長毛已經不受控制,搵佢選隨時令反對派連香三鑊。咦?唔通密謀換人?

幫李卓人拉票變趕票

喺李呃人(李卓人)參選立法會九龍西補選時,自覺高高在上嘅長毛,就經常同拒絕支持李呃人嘅年輕網民鬧交。如果鬧得有point嘅又無妨呀,當係切磋嘛,但長毛就淨係識語無倫次,鬧人嘅金句包括:「我×你班蛤蟆呀!你有票?我唔要呀!」「除咗喺呢度打飛機之外,你班蛤蟆仲識做乜?」名副其實幫李呃人趕客。

喺李呃人輸咗之後,成班反對派大佬都叫做假惺惺做台戲話要道歉呀、檢討呀,仲出口術話要拉「港獨」分子嘅票。但長毛就繼續話之你,公開話「老實講我唔係好想道歉」,仲寸班「焦土派」:「覺得輸咗個選舉仲好嘅,咁我有咩辦法?」

日前,「社區前進」成員、預備出嚟參加出年區選嘅林兆彬,同長毛合作做網台節目時,就因為叫長毛唔好再「×票」,而俾對方狂鬧成6分鐘,其間林兆彬成隻鵪鶉咁,如果段片俾人喺區議會選舉期間放上網,咁就好笑囉。

可能想盡早搞走呢位「政治負資產」同豬隊友,余若薇前日就上咗親反對派傳媒人李慧玲主持嘅網台節目度,話自己擔心如果喺前年新東補選投票畀「本土民主前線」前發言人「獨」琦(梁天琦)嘅6萬個選民,不滿意「老泛民」或者長毛,當長毛出選新東補選,呢批選民就會玩「焦土」唔投票,到時反對派輸埋都未定。

佢又話長毛已經不受控制,好似工黨上星期五開記招幫李呃人告急,長毛就話唔應該告急,當反對派全部人希望團結一致、表達同一信息嘅時候,長毛就有自己嘅信息喎。

撩交嗌辣㷫「本土派」

李慧玲就話,當主流反對派選完之後諗住點同「本土派」傾合作,長毛都仲係同「本土派」撩交嗌,如果仲係維持咁嘅狀態,長毛去馬新東補選,「本土派」嘅年輕支持者投唔投佢係好大嘅隱憂。

「同一信息」?乜民主唔係應該和而不同嘅咩?成日同長毛隔空開拖嘅「無敵神駒」仇思達,今次就撐對方嘞:「余若薇大律師又鬼拍後尾枕!原來『泛民』係唔可以有自由意志,講乜都要受到大台控制同規範㗎?咁完全係違反民主。今次我撐『×票雄』呀!唔該『泛民』尊重政治倫理,唔好打壓雄仔。堅決捍衛梁國雄出戰新界東補選權利!」

神駒伸晒橄欖枝,都要長毛肯收先得㗎!不過長毛之前講過「本土派」畀票佢都唔要,睇怕都係一嘢撥開人哋定嘞!

【華發網根據文匯報採編】

此文由華發網繁體版編輯,未經允許不得轉載: 華發網繁體版 » 法治論壇 » 【今日之星】余若薇鬧長毛不受控 選新東恐輸多劑

讃 (1)
分享至:

評論 0

暫無評論...
驗證碼
取 消
请选择理由
取消
私信记录 »

请填写私信内容。
取消
加载中,请稍侯......
请填写标题
取消